×

ერთხელ Fallout 76-ის სამყაროში…

ერთხელ Fallout 76-ის სამყაროში…

არსებობს ჩავარდნები. ხდება ხოლმე. საუკეთესო განზრახვები გაქვს, მაგრამ ხან ეს არ გამოვიდა, ხან ის და ბოლოს ამაყი კი ხარ რაც გააკეთე, მაგრამ ყველა ამბობს არ ვარგაო. მარტო შენ იცი რა გზა გაიარე რომ ამ „არ ვარგამდე“ მაინც მიგეღწია. ასევე არსებობს მეგა-ჩავარდნები. მთელი გზა არაფერი გამოდის. შენც იცი რომ საშინელება გააკეთე და ყველა დანარჩენმა. კიდევ, არსებობს  Fallout 76.

ოდისეა Fallout 76 წარუმატებლობაზე, კრახზე და დედის გინებაზე მთელმა ინდუსტრიამ იცის. მორგი არ არის აქ გვამში რომ ვიქექოთ. მაგრამ, მთელ ამ ფეკალიების კორიანტელში, არის ერთი ისტორია, რომელიც მინდა გაგიზიაროთ. სიმართლე გითხრა, რაღაც გაგებით გენიალურია.

კოლექციური გამოცემები Hardcore ფანებს ძალიან უყვართ, ზოგჯერ ზედმეტადაც. Bethesda-მ ჩვეულებისამებრ სპეციალური 200 დოლარიანი გამოცემა დაანონსა – Power Armor Edition. ამ ფასში შედიოდა – ლეგენდარული ჩაფხუტი, სრულყოფილების გრძნობა, დამატებითი ციფრული ნივთები და კიდევ ერთი ნივთი.

აი, მარცხნივ ხედავთ? ლამაზი ჩანთა როა. კარგად გამოიყურება არა?! რა მასალისაა თქვენი აზრით? ნაჭრის იქნება ალბათ. კარგი მერჩენდაიზია. გამოსადეგარი. ფანისთვის კი საერთოდ სექსუალური. გამოცემის აღწერაში ჩანთის ქება-დიდება მიდის.

თამაში როდესაც გამოვიდა, შემდგომ განვითარებული ამბები უკვე ისტორიის ნაწილია. ბაგები, ცარიელი სამყარო, გატეხილი გეიმფლეი, წუნიანი ტექნიკური მხარე. ამას კიდე არაუშავს. ცუდად გაკეთებული თამაშები არ გვინახავს თუ რა?! მაგრამ, როგორც აღმოჩნდა, Bethesda-ს მარცხი მარტო ციფრული სამყაროთი როდი შემოიფარგლებოდა.

ხომ არ დაგავიწყდათ ის სექსუალური ჩანთა Power Armor Edition-იდან? მიიღო ხალხმა ეს სპეციალური გამოცემა და აკანკალებული ხელებით მისი გახსნა დაიწყო. დამტვრეული თამაშის კომპენსაციად, ხარისხიან მერჩენდაიზს მაინც ელოდნენ. რა გითხრათ? რით გაგახაროთ?
როგორც ერთმა იასამნისფერმა უცხოპლანეტელმა თქვა, რეალობა ზოგჯერ იმედს გიცრუებს. აღნიშნული ჩანთა აღმოჩნდა არა ნაჭრის, ან რაიმე სხვა ხარისხიანი ნაჭრის, არამედ ნეილონის. ცელოფანი ფაქტობრივად. Yeah…


თავისთავად, ხალხი გაბრაზდა. გატეხილი თამაში, ცელოფანი ლამაზი ჩანთის მაგივრად. Bethesda-ს ყველა მხრიდან შეუტიეს. უამრავ საჩივარზე, ხალხმა კომპანიისგან ასეთი პასუხი მიიღო: მასალები არ გვეყოო. ხო, Bethesda-მ ნაჭერი ვერ იპოვა ჩანთების შესაკერად.

მიუხედავად ასეთი უხეში პასუხისა, Bethesda მიიღო გადაწყვეტილება, რომ საჭირო ჩანთებს მაინც შეკერავდა. მაგრამ, ამისათვის მომხმარებელს სპეციალურ საიტზე განაცხადი უნდა გაეკეთებინა, მისამარტებით და ამბებით. თვითონ საიტი ალბათ თამაშის ძრავაზე კეთდებოდა და ბაგებით სავსე იყო. სრული ინფორმაცია მომხმარებლებზე ყველასათვის ხელმისაწვდომი გახდა. ვაი-ვაგლახის მერე Bethesda-მ საიტი დახურა.

ამასობაში, საინტერესო დეტალი ამოტივტივდა. ყველამ ხომ ვიცით, რა ტივტივებს ყოველთვის? აღმოჩნდა რომ, ლამაზი, თუმცა ცოტა განსხვავებული, ნაჭრის ჩანთები Bethesda-მ შეკერა. სად წავიდა მაშინ? ბლოგერებთან. ვისაც თამაში უნდა მიმოეხილა, სწორედ ისინი ჩათვალა კომპანიამ პრიორიტეტულად.


Power Armor Edition მყიდველების დასაწყნარებლად, Bethesda-მ ციფრულად დავაშოშმინებთო. თამაშში არის Atomic Shop, სადაც სხვადასხვა თამაშის ნივთების ყიდვა შეიძლება. სკამები, ტანსაცმელი, პარკეტი. მოდი და ვალუტას მივცემთო, ამ მაღაზიაში ნივთების ყიდვა რომ შეძლონო. 500 ატომი დაურიგეს გაბრაზებულ ხალხს (ადგილობრივი ვალუტა). 500 ატომი ეკვივალენტია 5 დოლარის. Yeah…

ახლა კი, მივდივართ იმ ნაწილთან, რომელიც ტექსტის ავტორმა გენიალურად ჩათვალა. ციფრულ მაღაზიაში არის კოსტუმი, რომელსაც თანდართული აქვს ლამაზი ნაჭრის ჩანთა. მაგრამ საქმე იმაშია, რომ ეს სკინი, 700 ატომი ღირს. ანუ, ხალხს რომელსაც ჩანთის იმედგაცრუებისთვის 500 ატომი დაურიგეს, ვერ იყიდიან მსგავს ჩანთანს თამაშში. ეს ან დაუდევრობის უმაღლესი მაგალითია, ან ტროლინგის.

ჩანთა ერთადერთი სისულელე არაა რაც ამ თამაშს მოუვიდა. კიდევ იყო სასმელთან დაკავშირებული ფიასკო. მსგავსი განმეორდა, Bethesda ხალხს ხარისხიანი პროდუქტი შეპირდა, ბოლოს კი გადამუშავებული პლასტმასი გაუგზავნა.

რა დასკვნების გამოტანა შეიძლება ამ ისტორიიდან? დანაპირები შეასრულე?! ხალხი არ მოატყუო?! მაქსიმალურად ეცადე ყველაფერი კარგად გამოგივიდეს?! რაღაც ბანალურია. მოდით, meme მაინც შეგვრჩეს.

დატოვეთ კომენტარი

Please Login to comment
  გამოიწერეთ  
შემატყობინე