×

GOG Galaxy 2.0 – თამაშების მთელი ბიბლიოთეკა ერთ სივრცეში

GOG Galaxy 2.0 – თამაშების მთელი ბიბლიოთეკა ერთ სივრცეში

ფაქტი სახეზეა, PC პლატფორმა გადატვირთულია თამაშების კლიენტებით, ყველა კომპანია ცდილობს საკუთარი ბიბლიოთეკის შექმნას. ყველაფერი ვალვმა დაიწყო სტიმის პლატფორმით, მაგრამ, დღეს, ზოგს მისი მოგების განაწილება არ მოსწონს (Epic, Ubisoft), ზოგს კი ექსკლუზიურობა ძალიან უყვარს (EA).

პატარა თუ დიდმა კომპანიებმა არაერთხელ სცადეს სტიმის ტახტიდან ჩამოგდება, მაგრამ ამაოდ. მხოლოდ შარშან, Fortnite-ით გაძლიერებულმა ეპიკმა, ცოტათი შეარყია ვალვის დომინანტობა ბაზარზე.

მოკლედ, სიტუაცია ძალიან დამღლელია გეიმერებისთვის. მათი მთავარი მიზანია სიმარტივე, კუთვნილი თამაშების შეუზღუდავი წვდომა და არა მათი ძიება 10 სხვადასხვა სისტემაში (ბევრი პლატფორმა ერთსა და იმავე თამაშებს ყიდის).

როგორც ჩანს, სწორედ ასეთი პრობლემის მოგვარება გადაწყვიტა, შედარებით პატარა და იშვიათად კარგი სახელის მქონე კომპანიამ – CD Projekt Red, რომლებიც არიან Witcher-ის სერიებისა და Cyberpunk 2077-ის შემქმნელები. კომპანიას უკვე აქვს პლატფორმა GOG, რომელიც ფოკუსირდება უფრო ძველ თამაშებზე. მაგრამ ახალი კლიენტი, GOG Galaxy 2.0 საშუალებას მისცემს მოთამაშეებს, რომ დაუკავშირონ სხვა კლიენტები ერთ პლატფორმას და მართონ კუთვნილი თამაშები ერთი ადგილიდან.

GOG Galaxy 2.0 საშუალებას მისცემს მოთამაშეებს, რომ მოახდინონ სტიმისა და სხვა პლატფორმების მიღწევები დაკავშირება. ასევე, შესაძლებელი იქნება თამაშების პირდაპირ ერთი ადგილიდან დაყენება. დროთა მანძილზე კი, პლატფორმას დაემატება საერთო ჩათის სისტემა და კლიენტებს შორის საუბრის შესაძლებლობა.

CD Projekt Red ცდილობს, რომ რაც შეიძლება მეტი კომპანია მოიწვიოს პარტნიორად და Microsoft უკვე დათანხმდა შემოთავაზებულ წინადადებას.

პროექტი ძალიან ამბიციურია, მაგრამ იდეალური გეიმერებისთვის. ვნახოთ, რას შემოგვთავაზებს საბოლოოდ GOG Galaxy 2.0.

დატოვეთ კომენტარი

Please Login to comment
  გამოიწერეთ  
შემატყობინე